Act 23 | ASO | STEP | Paulo' aza gisili hize mino ti' lo lo-ngimine': Neze zuhokizo, naza neni' lu'nemu' giluvo O'moso'mi velelo' laminekovo' vevese minivo mine do dizuvoni' idi'nise ne a'mine'mino nouve.

Acts 23

1 Paulo' aza gisili hize mino ti' lo lo-ngimine': Neze zuhokizo, naza neni' lu'nemu' giluvo O'moso'mi velelo' laminekovo' vevese minivo mine do dizuvoni' idi'nise ne a'mine'mino nouve. 2 Ne'mine lo nolivo eveneto' medelo mino O'moso inite' lehize-daa' ive naba Anania' aza Paulo' minine' avita minave ti' lo lo-ngimine': Lingine velelo' izilevo. 3 Lo lavo Paulo' ti' lo lo-imine': Gaza lukau' guho' novine' gei' nene O'moso'mo gebeleleseive. Gaza nene Mose' lo huko line' akalo' nele'mizo molalove lo nolane'za a'mine lo huko line' gamazi nene avuto' ogo nibililizave lo go'ine noizabe. 4 Ti' lo lavo a'mido' minavete ti' li li-imani': O'moso'mo ele'mize molavo eveneto' medelo mino inite' lehize-daa' ive naba ma nenako eze nanimu' dovo' ledevo' nane. 5 Likevo Paulo' aza ti' lo line': Lingine zuho gizebo o-lengedaa' ive guvelesi ve dovo' ledevo' amozo li gizikevo neine' ma nenako aza nene eveneto' medelo mino O'moso inite' lehize-daa' ive naba neive lo giluvodini ne'mine lo ma lamuvodine.

6 Ne'mine lo kanisole muliseuti' ve linge ma nene Sadukaio' evene' ido' linge ma Halisaio' evene' minani' nemu' gelo gamazi naba lo kanisole aleve ti' lo lo-ngimine': Lingine neze zuhokizo, neze ize'ne avo'nemote nene Halisaio' aleve nizave ido' nazasi nene Halisaio' ve nouve. Helakuti' otaa' nene neive lo gelo nouvoni' nemu' nene gonito' nele'mizi nimilave line'. 7 Ne'mine lo lavo Halisaio' alevesi Sadukaio' alevesi gamazi'ine'mo lovo'ningu' ogavo vi eza ema vani'. 8 Sadukaio' aleve ingine hele noloninguti' otaa' ido' angelo' ido' heta ve ne'mine inite' nomive li laa' navo Halisaio' aleve ingine ne'mine initekumu' inite' gihile ve li laa' nani' nemu' vi eza ema vani'. 9 Ne'mine ikevo mulise'ningu' gilili ngololoka li Halisaio' aleveukoti' mono' monovo apizi ngimaa' ave linge ma oti amuzo mili ti' li lani': Mene ve'mi lihimemu' gilune' ma nomive. Angelo' nizani' ido' O'moso'midati' inite' mali'mo gamazi lo-eme noline' nene nadive lo lolone. 10 Ne'mine li gopo' napa gamazi li lolize gamazi likevo amiliti guve'inesi ve naba aza nene Paulo'ni izi giti hulilizahe lo ehelele izavo ami lo-ngemavo igi kanisoleliti vovo'ninguti' ele'mizi di numu'ninguko vani' ve.

Paulo'ni Bililisa Gohoni Milani' Gamazi

11 Ne'mine ikevo holuka' ingi nizavo Guvelesi ve'mo Paulo' neida soto' o emo ti' lo lo-imine': Golise gelamo luka amuzo molavo minezo. Zelusalemi numuda neni' gamazi'ne lo soto soto' oga' abe. A'mine'mine ogo Loma ebeta lo soto' olosane. 12 Ne'mine lo lavo go' lavo Zuda ve di bizi lovo gizi Paulo'ni belelone li noso' nite' malise ani'. Olihe belamo noso' nite' ido' noso nalone' nene O'moso'mo usi' ize-lidivo li lani'. 13 A'mine gamazi li hukave nene foti (40) ne'mine ivile' igi minavete li hukani' ve. 14 Li huki eveneto' medeli mini O'moso inite' lehizi-daa' ave nabasi mono' gizebo vesi nizada vi heteli ti' li li-ngimani': Paulo'ni belelesa olihe belamo noso' nite' malise ogo minelone lo lo hukokune. Ido' a'mine lo hukune' gamazi gele damolone' nene O'moso'mo usi' ize-lidivo lo lo hukokune. 15 Ne'mine li lingine kanisolesi amiliti guve'inesi ve nabala gamazi ti' li hulikevo vilive: Gaza Paulo'ni leli' muliseuko imiselanivo alive. Gamazi've lavo gele lamine' olonize. Ne'mine li golo izikevo gamazitine gelo ne'mine ogavo laza Paulo' nene akalo' navo gohoni ongo belelone.

16 Ne'mine likevo Paulo' alunolo'mi gipele aza gohoni ingalizani' gamazi lani' nene gelo vo amiliti numungu' dizo omolohine Paulo'ni nene lo-imine'. 17 Lo-emavo Paulo' aza amiliti gizebo ve ngomo nene asi lo-do ti' lo line': Gipe mene guvelesi ve naba neida ele'mizo vanivo gamazi ma lo-emelive. 18 Lavo aza guvelesi ve naba neida ele'mizo vo ti' lo lo-imine': Nala' numungu' neive Paulo' aza asi lo-nemoo gipe mene gei' gamazi lo-gemelove nolize nemu' ele'mizo geita vozo lavo ele'mizo nouve. 19 Ne'mine lavo guvelesi ve naba aza gipeli'mi analo' do ele'mize abaza' ogo mino longo' o-do line': Nani gamazi lo-nemelesa labe. Lo-nemezo. 20 Lo longo' o-davo ti' lo lo-imine': Zuda ve ingine Paulo'ni aize' nene kanisoletida ele'mizo lomanivo eze monovo gohi vise' ogo gele lamine' olone li longo' i-gidilisa gamazi di hamo' naze. 21 Igi nilavo ma gele ngemamozo. Engikuti' evene' foti (40) mini a'mingu' gohisi imine' mili nizave. Ingine nete noso' nite' namo ido' noso namo malise gehepeve o mino Paulo'ni belosa noso nite' nalone li lovo gizi gohoni niingi gei' gamazimu' gapepe' igi gizebo i nizave. 22 Ne'mine lavo gelo guvelesi ve naba aza ti' lo lo-imine': Gaza gamazi lo-nemane' nene lo-nimuve lo evene' masi lo nese nese ogo lo-ngemamozo lo gipe nene lo-emo imiseline'.

Loma Amiliti Gizebo Ve'ine Nabali'mo Paulo'ni Imiselavo Aza nGamani Naba Heliki' Neida Vine' Gamazi

23 Ne'mine lo guvelesi ve naba aza amiliti gizebo ve seta' asi lo-ngemo ti' lo lo-ngimine': Lingine li-ngimikesivo ami misubou' aka vilizave nene tu hadeti (200) ido' hosi ize mehenelo' vilizave nene sevedi (70) ido' goholo' dalizave nene a'mine'mine ogo tu hadeti (200) ne'minete di va'va' igi mini holuka' naeni (9) kiloku Kaesalea ebeta vilizave. 24 Ido' di goloso i-damavo lamine' ha neivo ele'mizi ngamani naba Heliki' neida vilizangumu' nene Paulo'ni hosi linge ma di va'va' i-dilo. 25 Ne'mine lo lo-ngemo luhuvo nite' ti' lo gizine': 26 Naza Kalaudio' Lisia' nGamani naba Heliki' gei' gopo'ni nolo luhuvo nite' mene ti' lo nogize-giduve. 27 Gaza guvekasi ve naba make, ami ingine ve nene ma ele'mizi nivave. Aza nene Zuda ve ingine analo' dii bili hililisa navo naza nene Loma ve neive lo gelo ami ma ngele'mize do vo a'ninguti' ipe' ogo do u' izune' ve. 28 Do u' izo bililisa ani' nene nani lihime'vemu' ne'mine i-dilisa nahe lo ne'mi monovo gelelove lo gelo ele'mizo engi' kanisoleliti muliseu' ele'mizo lomuvoni'. 29 Ele'mizo lomo goni' i-di lani' gamazi giluvoni' nene ei' laa' ine' gamazi nene engi' lou' gamazi'ine lido' vo milise' osa'mive li goni' i-dani'za lihime've apaso bele helelonido' lisihe' o minine' initekumu' nehe nala' numungu' hulo-delonido' lisihe' o minine' initekumu' nehe ne'mine initekumu' goni' i-damave. 30 Ne'mine lo gelo engikuti' evene' linge ma ingine gohoni ingi a'mine ve belelone lani' nene gelo geita imiselekuvo novive. Ido' gonito' ele'mizi nimilave nene gei' vekalo' gamazi li soto' ikevo geleline lo lo-ngemekuvo alisave. 31 Luhuvo nite' ne'mine lo gizo ngemavo gamazi've gili di ami ingine a'mine holuka' nene Paulo'ni ele'mizi Adipatili ebeta limi hetelani'. 32 Limi nihetelavo go' lavo ami linge tine' mili numu'nida ikevo hosi izelo' vave ingine Paulo'ni ele'mizi vani'. 33 Ele'mizi vi Kaesalea numuda heteli luhuvo nite' ma nene ngamani naba imi Paulo'nisi anau' milani'. 34 Ne'mine ikevo luhuvo gato misubo'vemu' longo' o-dine'. Longo' o-davo aza Kilikia misuboukoti' ve nouve lavo gelo 35 ti' lo lo-imine': Gonito' gele'mizi milaa' ave ingine igi hetelikevo gei' gamazika gelelove. Ne'mine lo amiliti a'ningu' molo lo-ngemavo Helode' numu've nabau' hulimiki gizebo i minani' ve.